21-25 қазан аралығында Тараз қаласындағы Назарбаев Зияткерлік мектебінің “Атамекен” шаңырағы “Туған елге тағзым” өлкетану-зерттеу экспедициясына қатысты.

Жоба аясында оқу, шығармашылық, спорттық және ғылыми жетістіктері үшін іріктелген 12 делегаттан тұратын экспедициялық топ Қостанай қаласы мен облыстың көрікті жерлерін зерттеуге аттанды.

Балалар саяхатын Қостанай қаласының тарихи-өлкетану мұражайынан бастады, онда Торғай облысынан І және ІІ шақырылған Мемлекеттік Думаның депутаты Ахмет Бірімжановтың қызметімен танысты. Сондай-ақ, өздерінің жерлесі Әбілхайыр ханның өмірі туралы қызықты мәліметтер алды.

Экспедицияның келесі нүктесі “Жеңіс” саябағы болды, онда балалар Ұлы Отан соғысы кезінде қаза болған жауынгерлерге тағзым етті.  Саябақта қатарласа тізілген соғыс кезінде пайдаланылған әскери техника оқушыларға ерекше әсер қалдырды.

Қостанай облысының тарихи ескерткіштерінен балалар Ы.Алтынсарин мемориалдық кешенінде болды. Педагог-ағартушының өмірінен көптеген қызықты деректер алып, облыс бойынша Ыбырай Алтынсарин ашқан мектептер картасын зерттеп қайтты. Тың жерлерді игерудің 30 жылдығына арналған “Тың игерушілерге” архитектуралық монументі де жас зерттеушілердің қызығушылығын тудырды.

Рудный қаласында экспедиция қатысушылары елдегі ірі “Соколов-Сарыбай” тау-кен байыту кәсіпорнының ұжымымен кездесіп, темір кенді шекемтастарды өндіру процесін зерттеді.

Оқушылардың пікірінше, ең қызықтысы “Қазақ тұлпары” жылқы зауытындағы саяхат болды. Гофман Виталий Владимирович – ат зауыты директорының орынбасары балаларға Жамбыл облысының “Луговой жылқы зауытымен” сирек тұқымды жылқыларды өсіру жөніндегі алдағы бірлескен жоспарлары туралы әңгімелеп берді.

Өнеркәсіп орындарының тізімінде келесі “Қостанай ұн комбинаты” акционерлік қоғамы болды, ол Қазақстанда ұн және макарон өнімдерін өндіру бойынша көшбасшы болып табылады және тіпті ТМД-дағы ең ірі макарон өндірушілердің бестігіне кіреді екен. Балалар макарон өнімдерін өндіру және дайын өнімді сақтау қоймасына жіберу үдерісінің куәсі болды.

Қостанай облысының табиғи байлықтарын оқушылар ондағы Наурызым және Әулиекөл аудандарында орналасқан Наурызым мемлекеттік табиғи қорығында толық көре алды. Осы жерде 40 жылдан астам уақыт жұмыс істеп келе жатқан Мария Зеленцова өлке ерекшеліктері мен қорықтың қызметі туралы айтып берді. Танымдық экскурсия жергілікті орманшылармен танысумен жалғасты.

– Біз орманшының жұмысымен жақынырақ таныстық. Олар бізге орман өмірінен қызықты сәттерді айтып берді. Сол жерде мекендейтін қасқырлар орманшыларға тимейтіні мені таң қалдырды.  Керісінше, олар қорықты қорғауға көмектеседі екен, – деді Тараз қаласындағы Зияткерлік мектептің 9-сынып оқушысы Аяжан Кемелбек.

Саяхаттың соңғы нүктесі Заречный кентіндегі “Арғымақ” ипподромы болды, онда жыл сайын бәйге, көкпар, аударыспақ, қыз қуу, теңге ілу және жамбы ату бойынша жарыстар ұйымдастырылады екен. Жергілікті шебер спортшылар қонақтарға қыз қуу ұлттық ойынынан үзінді көрсетті.

Қостанай Зияткерлік мектебінің шебер балалары достарына қолдан жасалған қымыз сақтауға арналған дәстүрлі қазақ ыдысы – торсық кәдесыйын сыйлады. Сонымен қатар, қонақтар үшін “Қостанай картасы”, “Фотожорық” және т. б. ойын-сауық бағдарламасы ұйымдастырылды.

Экспедицияның соңғы күні Тараз қаласындағы Назарбаев Зияткерлік мектебінің педагог-ұйымдастырушы-кураторы Нұрбол Аманбеков Қостанай мектебіне алғыс ретінде өзі шығарған өлеңін арнады:

Қ О С Т А Н А Й

Бұл мекен астықтың өлкесі

Көп болсын алар биік белесі

Елімнің кең жазира даласына,

Жүрегімнен жыр арнадым келесі

Мен көрдім Қостанайдың қасиетін

Тыңдадым ұлылардың өсиетін

Бас иемін қонақжайлы халқына,

Сүйетұғын тарихы мен туған жерін

Ұмытпаймыз батырлардың ерлігін

Ойлаған ел ертеңі мен елдігін

Өшпес мәңгі есімдерін,

Қадір тұтып,құрметтейді ел бүгін

Соколов – Сарыбай кен өндіру аймағы

Байлық көп терең жатқан сайдағы

Өндірісі өркендеп жанған сайын,

Жарқырасын жұлдызы маңдайдағы

Асыл тұқым әрі текті жылқылар

Кез келген оларды көріп қызығар

Күн шыққанымен Қостанайда,

Бетіңді тоңдырар суық ызғар

Халқымның ұлттық ойындары

Қазақтың нағыз палуан ұлдары

Әрқашан да жарыстарда,

Жеңісті болсын ақ жолдары!

Алтын,мыс өндіреді Таранында

Жұмыспен қамтылған халық мұнда

«Туған елге тағзым» жобасының

Ғұмыры ұзақ болсын жылдан жылға

Науырызымның флорасы мен фаунасы

Қазағымның кең байтақ даласы

Міне осындай көркем де керемет,

Қазақстанның Қостанай деген қаласы

Көріскенше Қостанай құтты мекен!

Қайта айналып,қауышуға ынтық еткен

Тамаша табиғатқа тамсандырып,

Оралуға Нұрболды асық еткен!