Таразская Интеллектуальная школа провела творческий вечер «Ұлы Дала мұрагерлері»

Тараздағы Назарбаев Зияткерлік мектеп оқушылары Тұңғыш Президент күніне арнап «Ұлы Дала мұрагерлері» атты шығармашылық кешін өткізді. Концерттік бағдарламаның негізгі мазмұны Абайдың 175 жылдығы, Ұлы Жеңістің 75 жылдығы мен Жамбыл облысының 80 жылдық мерейтойлары аясында өрбіді.

Кешті мыңға жуық көрермен «Баласағұн» мәдениет сарайында тамашалады. Олардың арасында Зияткерлік мектеп қауымы, серіктес ұйымдар, әлеуметтік орталық өкілдері мен басқа да қонақтар болды.

Бағдарлама оқушылардың ғылыми жәрмеңкесі мен шығармашылық алаңдарын қамтыған көрмеден бастау алды.  Жайылымдағы малдың орнын анықтайтын GPS құрылғы, ғарыш кемелері, түрлі қуатты зымырандар, сүт қалдықтарынан құрғақ сарысу өндретін бизнес жоба, Жамбыл маңындағы петроглиф мағыналарын ашу, өңірдің туризмдік бағыттарын дамыту секілді оқушылардың еңбектері ұсынылды.

Сонымен қатар, қосымша білім беру курсы бойынша киіз және жүн өнімдерінен бұйым жасау, тоқыма және тігін шеберханасы, ағашты өрнектеу, бейнелеу өнерімен айналысатын оқушылардың туындылары қойылды.

Оқушылар ұлттық аспаптарда Құрманғазының күйлерін ойнап, «Қазақтың 100 әні» жобасындағы әндерден попури орындады. «Арманшылдар» театрландырылған көрінісі арқылы зияткерлер болашағынан зор үміт күткен, елі мен жері үшін адал еңбек ететін білімді жастар туралы баяндады. Мерейлі кештің ажарын 50 оқушының қатысуымен өткен «Ұлы дала мұрагерлері» хореографиялық композициясы ашты.

«Ұлы дала мұрагерлері» концерті аясында Зияткерлік мектептердің «Екі апта ауылда», «Ата-ана жұмысында 10 күн», «Туған елге тағзым» сынды жазғы әлеуметтік тәжірибелері мен жобаларының орындалуы көрініс тапты. Кеш соңында Тараз қаласындағы Назарбаев Зияткерлік мектебінің директоры Тимур Нуркешов қонақтарды алдағы мерекелермен құттықтады:

– Құрметті қауым, сіз бен біз болып еліміздің ертеңгі тұтқасын ұстар ұрпақты тәрбиелеудеміз. Өзімізге жүктелген жауапты істі бірге абыроймен атқарып, ел дамуына үлес қосайық. Біздің барлық бастамамызға қолдау білдіріп, сенім артқан әрбіріңізге алғыс білдіремін. Келе жатқан шуақты мерекелеріңіз құтты болсын,  – деді мектеп басшысы.

Тараздағы Назарбаев Зияткерлік мектебі 2018 жылдың күзінде Халықаралық мектептер кеңесінің (CIS) аккредиттеуінен өтіп, беделді әлемдік ұйымның мүшесі атанды. Елеулі көрсеткіштер арасында оқушылардың сан алуан халықаралық және республикалық байқаулардағы жетістіктері де баршылық. Бүгінге дейін мектептен 488 түлек шыққан. Олардың 40-қа жуығы әлемнің беделді университеттеріне түссе, 90-нан астамы Назарбаев Университетінде білім алуда. Ал, 95%-дан астамы мемлекеттік гранттарға ие болған.