Тараз қаласындағы Назарбаев Зияткерлік мектебі оқушыларының зерттеу жұмыстары Ресей астанасында өткен «Языкознание для всех» атты Халықаралық ғылыми-практикалық конференцияда екі жүлделі орынға ие болды.

Қазылар алқасының шешімі бойынша «Языковой портрет представителей различных профессий» секциясының үздік жұмысы ретінде Исламбек Сариевтің жобасы танылды. Қазылар алқасының мүшелері оқушының жоғары дайындық деңгейін, кәсіби көзқарасы мен оның жұмысының жаңалығын атап өтті.

Юлия Хан мен Әлия Маратова өз жұмыстарын «Профессиональная терминология» секциясында ұсынды. Олардың зерттеу нәтижесінде жарық көрген «Словарь феминитивов» атты жұмыстары қазылар алқасының ерекше қызығушылығын тудырған. Жоба 3 орынға ие болды.

Қазылар алқасының жеке жүлдесін Сапармұрад Агарысов пен Әйгерім Ищанованың «Язык рекламы как средство манипулирования» атты жобасы алды. Жұмыс нәтижесінде олар «Как составить рекламный текст» онлайн-қосымшасын жасаған.

Конференцияның бірінші күні дөңгелек үстелдер өткізіліп, онда оқушылар белгілі лингвист ғалымдармен тең дәрежеде тіл дамуының өзекті мәселелерін талқылады. Сондай-ақ, Тараздағы НЗМ оқушылары Амина Нұрланбекқызы, Исламбек Сариев және Әйгерім Ищанова сол күні ұйымдастырылған лингвистикалық ойындардың жеңімпаздары атанды.

Жеңімпаздарды байқауға дайындаған жетекшілері, мектептің орыс тілі мұғалімі Галина Станишевскаяның еңбегін де ерекше атап өткен жөн.