Жастар жылы аясында жалпы білім беретін мектеп оқушылары арасында  өткен  «Үздік ғылыми жоба-2019» республикалық байқауында Тараздық Зияткерлік мектеп оқушылары топ жарды.

Байқауда Жансая Байнабаева  «Ақын апологиясы немесе ақын Күләш Ахметованың шығармашылығындағы поэзияға құштарлық, парасатқа сүйіспеншілік мәселелері жөнінде» тақырыбындағы ғылыми-зерттеу жұмысын қорғап бас жүлдені иеленді.

Сонымен қатар, ғылыми додада «Қордай өңірінің радиоактивті ластанған жерлерін қайта қалпына келтіру жолдары мен проблемалары» зерттеу жұмысын ұсынған Айдана Еламан 2 орынды жеңіп алды.

Жеңімпаз қыздардың бірін әдебиетке баулып, екіншісін қоршаған ортаның ластану мәселелерін шешуге бағыттаған жетекшілері Амангүл Жанғазы мен Дина Алимжанова Құрмет грамотасымен марапатталды.

Сондай-ақ, оқушының дамуы мен өзінің кәсіби өсуін қатар ала жүретін Амангүл Бәкенқызы жақында өткен «Шағын жинақты мектеп жағдайында Lesson study-ді ұйымдастыру жолдары» облыстық ғылыми-тәжірибелік конференциясына қатысып, ерекше белсенділігі үшін алғыс хатпен марапатталған болатын. Конференция жұмысына Амангүл Жанғазы «Сабақ үдерісінде берілген ақпараттар арқылы оқушылардың академиялық тілде сөйлеу дағдысын дамыту» зерттеу жұмысын ұсынған.