Мемлекет басшысы «Болашаққа бағдар: рухани жаңғыру» мақаласында таяу жылдарға арналған міндеттерінің бірінде «Туған жер» жобасын жүзеге асыруды ұсынды. Туған жерге, оның дамуына айрықша атсалысу – шынайы патриотизмнің маңызды көріністерінің бірі деп атап айтқан болатын. Яғни аталған жоба жақын болашақта жалпыұлттық патриотизмнің нағыз өзегіне айналып, халқымыздың ұлттық бірегейлігінің мызғымас негізі болмақ.

Осыған орай, Елбасы ұсынған игі бастаманы жүзеге асыру мен қолдау мақсатында және елордамыз Астананың 20 жылдығы мен «Назарбаев Зияткерлік мектептері» дербес білім беру ұйымының 10 жылдық мерейтойы қарсаңында «Қолдайық, ауыл мектебін!» республикалық әлеуметтік акциясы Назарбаев Зияткерлік мектептері дербес білім беру ұйымы бастамасымен қолға алынды. Іс-шара еліміздің 16 аймағында орналасқан 20 Назарбаев Зияткерлік мектептерінің  қатысуымен өтті.

Акцияға Тараздағы физика-математика бағытындағы Назарбаев Зияткерлік мектебінің ұжымы мен оқушылары да ат салысты.  Игі  шара аясында Жамбыл облысы, Байзақ ауданындағы Қостөбе орта мектебіне 100 дана бөлме гүлдері, ақпараттық бұрыш, 300 ден астам көркем және ғылыми-танымдық әдебиет, 15 спорттық добы, үстел ойындары, 3D принтері және «Назарбаев Зияткерлік мектептері» ДББҰ Оқу бағдарламалары орталығы, Педагогикалық шеберлік орталығы, Педагогикалық өлшеулер орталығы жасаған  43 дана мұғалімдерге арналған  әдістемелік нұскаулар сыйға тартылды.

Астанадан арнайы ат басын бұрған «Назарбаев Зияткерлік мектептері» дербес білім беру ұйымы Төрайымының орынбасары Назипа Алтынбекқызы акция туралы былай деді: – «Бүгінгі орын алып отырған игі шара ауылдан шыққан түлектер мен басқа да мектептер тарапынан қолдау тауып, болашақта өз жалғасын табады деген сенімдеміз».

Акция күні Тараздағы Зияткерлік мектеп мұғалімдері мен Педагогикалық шеберлік орталығының тренерлері ауыл мектебінің ұстаздарына жаңартылған білім мазмұны мен критериалды бағалау, оқытудың әдістері мен технологиялары бойынша  консультациялар ұйымдастырды. Кітапхана қызметкерлері жергілікті әріптестерімен оқушыларды кітап оқуға ынталандыратын әдіс-тәсілдерімен бөлісті. Екі мектептің өзін-өзі басқару ұйымы мүшелері өзара пікір алмасып, болашақ қарым-қатынас жоспарын құрды. Сонымен қатар, «Туған жерім-Қазақстаным!» атты концерттік бағдарлама аясында мектеп оқушылары өнерлерін көрсетті.

Қостөбе орта мектебінің директоры Мамырбаев Нұрболат Серікұлы мектеп ұжымына алғысын білдіріп, болашақта да тығыз серіктестікте жұмыс атақарамыз деген ойымен бөлісті. Физика пәнінің мұғалімі Наурызбаева Халима өз алғысын өлең жолдары арқылы жеткізді:

Бұлттан шыққан күндей боп жарқыраған

Білімнің ауыр жүгін арқалаған

Назарбаев зияткерлік мектебіне

Мен осындай нық сенімді арта алам

Шет елменен тəжірибе алмастырған

Білімменен өнерді жалғастырған

Тəжірибені мектепке ұсынған да

,Білімді бол “ол сіздің алғашқы ұран

Көмек қолын мектепке созып келді

Қуаннғаннан сөз таба алмай қалдым енді

Білімдері тəжірибелі ұстаздардың

Бұзғандай қалың тоңды мұз бен сеңді

Басымды иіп тұрып ризалықпен

Алғысымды білдіргім келді енді.

Акцияны өткізуде «Казцинк» ЖШС,  Ұлттық құндылықтарды дамыту «Абырой» жеке қоры және Жексенбай Б. Н., Қазақстан Республикасы Тұнғыш Президентінің кітапханасы, «Деловой мир Астана» демеушілік қолдау көрсетті.