Көкшетаудағы NIS-те «Берік отбасы» бағдарламасы қорытындыланды

Көкшетаудағы NIS-те «Берік отбасы» халықаралық жобасы өз мәресіне жетті. Жеті апта бойы 7-сынып оқушылары мен олардың ата-аналары Оксфорд Брукс университетінің (Ұлыбритания) әлемге танымал әдістемесіне сүйене отырып, өзара сенімнің берік негізін қалау бағытында жұмыс істеді.

Қатысушылар үшін бұл бағдарлама тек дәрістер жинағы емес, толыққанды өміршеңдік тренингіне айналды. Интерактивті сессиялар барысында отбасылар диалог құру өнерін, мәселелерді бірлесіп шешуді және жеке шекараны қорғауды үйренді. Тренерлер жасөспірімдердің психологиялық «иммунитетіне» - жақындарының шексіз қолдауын сезіне отырып, сыртқы қысымға төтеп беру қабілетіне ерекше назар аударды.

Топтарға мектеп тренерлері Айнагуль Назарова, Марта Мушел, Айжан Жолдасбаева, Гульмира Елеуова және Дильназ Каиркенова кәсіби қолдау көрсетті. Ұйымдастырушылардың айтуынша, отбасындағы үйлесімді қарым-қатынас тек эмоционалды тыныштықтың кепілі ғана емес, сонымен қатар академиялық жетістіктердің қуатты қозғаушы күші болып табылады.