Тараз қаласындағы Назарбаев Зияткерлік мектебінің 12-сынып оқушысы Балнұр Ибраш Абу-Дабидегі (БАӘ) Нью-Йорк университетінің студенті атанғаны туралы ресми хаттан білді, ал грант көлемі бір оқу жылы үшін 77 000$ құрады.

– Мектеп бітіргеннен кейін мен оқуымды Абу-Дабиде жалғастырып, химия мен биологияны тереңірек зерттейтін боламын. Университет менің осы ЖОО-дағы оқуымды, Әмірліктерде тұруымды және басқа да ілеспе шығыстарымды толық қаржыландырады. Сондай-ақ, Нью-Йорк, Аккра, Берлин, Буэнос-Айрес, Флоренция, Лондон, Мадрид, Париж, Прага немесе Шанхайдағы New York University жаһандық университетінің кез-келген қаласында 2 семестр оқуға мүмкіндігім бар, – деп хабарлады Балнұр.

Оның айтуынша, университетке іріктеу өте қатал болған, оқушы қыз түрлі интернет-сауалнамалар мен тесттер тапсырып, портфолио әзірлеп, көптеген эсселер мен жеке сұхбаттардан өткен. Бірінші кезеңнен кейін (құжаттарды тапсыру және эссе жазу) Балнұр кандидаттық демалыс күндеріне шақырылды, алайда эпиджағдайға байланысты университет өкілдерімен кездесу виртуалды түрде өткен. Барлық кезеңді сәтті аяқтаған зияткер 10 мың ниет білдірушінің ішінен суырылып шығып NYUAD-тың болашақ 150 студенттерінің тізіміне енген.

– Өз мектебіме осындай мүмкіндіктер үшін, ұстаздарыма және ата-аналарыма зор алғысымды білдіргім келеді. Өйткені, олар менің даму мен өсу жолымда көп күш жұмсап, кез-келген бастамама қолдау көрсетті, – деп бөлісті ол.

Абу-Дабидегі Нью-Йорк университеті – әлемдегі ең таңдаулы университеттердің бірі, онда Айви лигасының көптеген колледждеріне қарағанда үміткерлерді қабылдау саны өте төмен. Университет сонымен қатар жеті жыл ішінде 14 Родс стипендиаттарын шығаруымен танымал, бұл әлемдегі кез-келген университетке қарағанда бір студентке артық көрсеткіш.