Тараздық NIS оқушысы Саяжан Жамеледенова Италияның ең әйгілі жоғарғы оқу орындарының бірі – Тор Вергатада оқу грантына ие болды. Мұнда оқушы қыз экономика мен халықаралық бизнестегі басқару бойынша білім алатын болады.

Саяжанның экономист-менеджер мамандығын таңдауы бекер емес. Өйткені ол бала кезінен жеке бизнесін ашу мен өз брендін жасап шығаруды армандап келеді.

– Мені бұл елдің бай тарихы, әдемі қалалары, дамыған мәдениеті мен асханасы және одан да маңыздысы тамаша адамдары қызықтырады. Италияда білім алу маған жақсы мүмкіндіктер мен ұмытылмас тәжірибе беретініне сенімім мол, – дейді грант иегері.

         Саяжан Жамеледенованың басқа да жетістіктері мен қызығушылықтары жетерлік. Ол Shymkent International Model United Nations, New Silk Way Model United Nations шараларының белсенді қатысушысы, француз тілінен өткен желілік олимпиада жеңімпазы, Британ консулдығы ұйымдастырған Science Stars байқауының финалисті.

         Сонымен қатар, зияткер оқушы халықаралық би байқауының гран-при иегері. Айта кетерлігі, байқау Италияның Рим қаласында өткен. Дәл сол сәттен бастап Саяжан осы елге оқуға түсуді мақсат еткен. Оқудан елге оралысымен кәсіпкерлікті қолға алмақшы.