Тараз қаласындағы Назарбаев Зияткерлік мектебінің түлегі Дана Құрманбек Еуропаның үздік ЖОО-ы саналатын Римдік Ла Сапиенца университетінің оқу грантына ие болды. Оқушы қыздың болашақ мамандығы халықаралық қатынастар және бизнес саласымен байланысты болмақ.

– Менің кәсіпкерлікке деген қызығушылығым экономика сабағында пайда болды. Онда біз бизнес-жоспарлар құруды үйрендік. Сондай жобаларымның бірі – қаржылық қолдауға ие болған сүт сарысуын қайта өңдеу арқылы тағамдық ұнтақ өндіру болатын. Жақын арада кішігірім цех ашуды жоспарлап отырмыз, – дейді Дана.

Естеріңізге сала кетсек, 2019 жылы Тараздық NIS оқушысы құрғақ сарысу өндіру бойынша бизнес-жобасын жүзеге асыруға екі миллион теңге көлемінде грант ұтып алған. Зияткердің бастамасын «Атамекен» Ұлттық Кәсіпкерлер палатасы «Бизнестің жол картасы-2020» бағдарламасы аясында қолдады.

Дананың айтуынша, ЖОО-на түсудің басты құпиясы мінсіз рәсімделген құжаттар пакетінде екен. Келер жылдың түлектеріне ол университетке өтінім жіберу кезінде барынша ықтиятты болу қажет деген кеңесін береді.

– Ең бастысы өз күшің мен мүмкіншіліктеріңе сену керек. Тек армандау ғана жеткіліксіз, сол арманға жету үшін нақты мақсаттар қоя білу маңызды. Дәл қазір біз үшін тек алға жылжитын кезеңдердің бірі, – деген пікрін қосты мектеп түлегі.