Тараз NIS жас зерттеушілері оқушы жастар арасында ұйымдастырылған «Қазіргі әлемдегі көркем мәдениет және білім беру» атты Бүкілресейлік ғылыми-зерттеу жұмыстары конкурсының жеңімпаздары мен жүлдегерлерінің қатарына енді.

Байқауға 11-сынып оқушылары Мөлдір Баймахан и Абылай Сыдыков «Ботамойнақ жерінің петроглифтері негізінде қола дәуірінің тарихи-мәдени моделін қайта құру» зерттеу жұмысын ұсынып, 1 дәрежелі дипломант атанды.

«2013-2017 жылдардағы археологиялық қазба материалдары бойынша ортағасырлық Таразды дамытудағы технологиялардың рөлі» жобасын сәтті қорғап шыққан 11-сынып оқушысы Балнұр Ибраш екінші орынды иеленді.

Үшінші орыннан «Түркілердің мәдени мұрасына апарар туристік соқпақ» атты жұмысымен топ жарған 11-сынып оқушылары Бауыржан Апил мен Ерсұлтан Тұрсын көрінді.

Тараз қаласындағы Назарбаев Зияткерлік мектебі оқушыларының жеңісі күтпеген жайт болған жоқ. Өйткені, Бүкілресейлік ғылыми-зерттеу жұмыстары конкурсына дейін оқушылардың жобалары халықаралық және республикалық деңгейдегі ғылыми байқауларда бірнеше рет жүлдегер атанып үлгерген.

– Аталған байқауға қатысу арқылы балалар жаңа деңгейге шықты. Олардың жұмыстары тарих тұрғысынан ғана емес, сонымен қатар әлеуметтік-мәдени маңызы жағынан да бағаланып, ғылыми жұмыстар жинағына енді. Осылайша, ТМД кеңістігі қазақ халқының өткен мәдени мұрасымен таныс бола алады, – деген ойымен бөлісті Зияткерлік мектептің тарих пәні мұғалімі және ОҒҚ жетекшісі Любовь Исатаева.