Назарбаев Университеті ұйымдастырған дәстүрлі HackNU  хакатонының жүлдегерлерінің қатарына Тараз қаласындағы Назарбаев Зияткерлік мектебінің оқушылары кірді.

Барша қазақстандық және шет елдік оқу орындарының студенттері мен оқушылары Google, BTS Digital, Facebook және Microsoft сынды ірі IT компаниялардың бизнес тапсырмаларын орындады.

Тараздық Зияткерлік мектептің 12-ші және 10-шы сынып оқушылары Сұлтан Мұстафин, Азат Қажымұқан және Саяжан Онласын BTS Digital компаниясының Aitu платформасына арналған өз шешімдерін ұсынып, 3-орын мен 100 000 теңге көлеміндегі сыйақыға ие болды.

– Біз 36 сағаттық үздіксіз бағдарламалау нәтижесінде Aitu пайдаланушыларына арналған қолайлы қосымша жасап шықтық. Оны құрастыру кезінде қолданудың ыңғайлылығы мен дизайнына назар аудардық, оны компания өкілдері жеке атап өтті, – дейді Сұлтан Мұстафин.

Оқушылардың Aitu қосымшасымен біріктірілген және пайдаланушыларға тікелей хабар алмасуға мүмкіндік беретін мобильді әлеуметтік қосымшасы «Цедра» деп аталады.

– Бұл команданың барлық мүшелерінің тәжірибесіндегі алғашқы хакатон. Бізде жүлделі орынға ие боламыз деген сенім болған жоқ, алайда барлығымыздың ынта-жігеріміз бен жеңіске деген ұмтылысымыз еліміздің IT жоғары оқу орындарының студенттеріен қалыспай қосымша әзірлеуге мүмкіндік берді, – дейді команданың ең жас қатысушысы Азат Қажымұхан.

Қазіргі таңда жас стартаперлер өз қосымшасын одан әрі дамытуды және оны қазақстандық нарықта ілгерілетуді көздейді.