Оқушылардың ғылыми-зерттеу жұмыстарын таныстыру, нәтижелерімен бөлісу мақсатында 10 сынып оқушылары – Жазықбай Лейла, Баймаханова Фатима мен 11 сынып оқушылары – Марат Мерей, Құрманбаева Фаризаның жұмыстары қоғамдық тыңдалымнан өтті. Қоғам қызметкерлеріне әлеуметтік маңызы бар 2 ғылыми-зерттеу жұмысы таныстырылды.

«Шындықты іздеудегі өмір: Амантай Айзахметовтың тұлғасы, шығармашылығы және зерттеулері» атты зерттеу «Знамя Труда» газетінде қызмет еткен журналист Амантай Айзахметовтың өмірін, шығармашылығын зерттеуге бағытталған. Жас ғалымдардың айтуынша қазіргі таңда Жамбылдық журналист жайлы деректер аз. 10 сынып оқушыларының басты мақсаты – Италияның Пирги қаласында табылған Алтын тақтайшаларды шифрлау әдісін ұсынған зерттеушінің еңбектері туралы ақпараттың таралуына ықпал ету, Википедияда парақша ашу және жазушының жеке басы мен шығармашылығына арналған фильм түсіру.

Қоғамдық тыңдалымда талқыланған келесі зерттеу – «Ұлы Отан соғысы кезіндегі Жамбыл облысы, Талас ауданы, Қосқұдық орман шаруашылығы аумағындағы еңбек қызметі». Ғылыми жұмыс кең көлемді зерттеуді талап ететіндіктен авторлар басты назарға тек сұрапыл соғыс жылдары тылда қызмет еткен неміс ұлтының өмірі жайлы алған. Енді жас ғалымдардың мақсаты – Мойынқұм құмындағы еңбекші-қоныс аударушы немістердің тарихын қалпына келтіріп, олар жайлы деректі фильм түсіру, мақала жариялау, Википедияда беттерінде парақша ашу.

Тыңдалымға Жамбыл облысы әкімі жанындағы Қоғамдық кеңес мүшесі Шоқпақов Қайрат, Ш.Мұртаза атындағы «Руханият және тарихтану орталығының» директоры Сауран Қалиев, Жамбыл облысы әкімдігінің Табиғи ресурстар және табиғат пайдалануды реттеу басқармасы орман және ерекше қорғалатын табиғи аумақтар бөлімінің бас маманы Гуляев Артем, «Жамбыл облысының немістер қоғамы»  ҚБ президенті Гибнер Александр, «Ежелгі Тараз ескерткіштері» мемлекеттік тарихи-мәдени қорық-музейі директорының орынбасары Крокошева Анна, облыстық «Знамя труда» газетінің журналисі Гүлжан Асанова қатысты.

Аталған жоба жетекшілері: Исатаева Л.Ж., Утегенова К.О.

Оқушылар жобаларын қорғаумен ғана шектелмей, көтерген мәселелерін шешу жолдарын, алдағы жоспарларымен де бөлісті. Тыңдалымға қатысқан белгілі тарихшылар, мемлекеттік қызметкерлер мен БАҚ өкілдері аталмыш жобалардың өзектілігін тілге тиек етіп, алдағы уақытта ақпараттық қолдау жұмыстарын жүргізу қажеттілігін айтты.