Тараздағы Зияткерлік мектеп мұғалімдерінің жобалары Мәскеуде жеңіске жетті

Мәскеуде өткен «IT-білім беру жүйесіндегі инновациялық ақпараттық-педагогикалық технологиялар» атты IX Халықаралық конференция-байқауында Тараздағы Зияткерлік мектеп мұғалімдерінің жобалары үздік деп танылды.

М.Ломоносов атындағы Мәскеу мемлекеттік университеті ұйымдастырған байқаудың қорытындысына сай, Зияткерлік мектептің биология мұғалім-сарапшысы Инна Аксенованың жобасы жеңімпаз дипломымен және бағалы сыйлықпен марапатталған. Ізденімпаз ұстаздың «Биология мұғалімдерін технологиялық және пәндік білімнің өзара әрекеттесу тәсілдеріне оқыту» атты жобасы қазылар алқасы мен қатысушылардың ерекше назарына іліккен.

– Байқауда мен педагогтардың үздіксіз IT-білім алуына жағдай жасап, кәсіби құзыреттілігін арттыруға арналған жобалық жұмысымды таныстырдым. Сондай-ақ бұл жоба оқушылардың да пәнге деген көзқарасын өзгертуге мүмкіндік береді, – деген ойымен бөлісті жеңімпаз ұстаз.

Сонымен қатар, мектептің информатика пәнінің мұғалім-модераторы Юлия Пряничникова дәл осы байқаудың сырттай кезеңіне «География және экономика мұғалімдеріне арналған Google Earth-ті қолдану бойынша электрондық құрал» тақырыбындағы жобасын ұсынып жеңіске жеткен.

Ұстаздардың айтуынша, ондағыларды Назарбаев Зияткерлік мектептерінің оқыту процесі мен мұғалімдердің кәсіби дамуын ұйымдастыру тәжірибесі қызықтырған.

– Жобамды қорғағаннан кейін кейбір қатысушылар маған келіп, Назарбаев Зияткерлік мектептерінде жұмыс істеуге ниетті екендерін айтып жатты. Өйткені мұнда заманауи білім беру міндеттерін тиімді іске асыру үшін барлық жағдай жасалған деп отыр, – деді Инна Аксенова.

Үш бағытта жобаларын қорғаған қатысушылар жұмысын Ресей ғылым академиясының ғалымдары бастаған халықаралық қазылар тобы сараптаған.