Тараз қаласындағы Назарбаев Зияткерлік мектебі оқушыларының бірден 3 жобасы Жалпы білім беретін пәндер бойынша республикалық ғылыми жобалар байқауының жеңімпаздары қатарынан табылды.

Файми Зуфаров, Мөлдір Баймахан, Абылай Сыдықов, Ақтоты Бостан және Мира Мирзабаева – Қазақстан Республикасы оқушылары арасындағы жыл сайынғы өтетін ең беделді байқау жүлдегерлерінің есімдері.

Ғылыми сайысқа оқушылар қоршаған ортаны қорғау және өлкетану бағыттары бойынша жобаларын ұсынды. Олардың ішінде В. Вернадский атындағы Бүкілресейлік жасөспірімдер зерттеу жұмыстарының байқауы, Балтық ғылыми-инженерлік байқауы сияқты халықаралық байқаулардың бірнеше мәрте жеңімпаздары да бар.

Олардың бірі 11-сынып оқушысы Файми Зуфаров, ол қазылар алқасының назарына ауыл шаруашылық жерлерінің өнімділігін арттырудың жаңа әдісін ұсынып, 2-орынға ие болды.

Мен құрдастарыма тек бір нәрсе айта аламын. Жетістікке жету жолында ешқашан тоқтап қалмаңыздар. Дамыңыздар, жобамен айналысыңыздар, – деп өз кеңесімен бөлісті Файми.

Бүгін салтанатты жиында барлық мектеп қауымдастығының қатысуымен байқау жеңімпаздары мен олардың ғылыми жетекшілері Инна Аксенова мен Любовь Исатаеваға құрмет көрсетілді.

Мира Мирзабаева мен Ақтоты Бостан, 1-орын иегерлері:

– Жобалармен айналыса отырып, өзіңнің жаңа қырларыңды ашасың. Ең қызықты сәттер жұмыс барысында болды. Ал бүгінгі марапаттау – біздің еңбегіміздің жемісті қорытындысы деп білеміз.

Бос уақыттарын Жамбыл облысында орналасқан петроглифтерді зерттеуге арнайтын және Ботамойнақ тауына көп күндік экспедицияларға жиі шығатын балалардың бірі Мөлдір мен Абылай. Олар өз сөзінде былай деді:

– Біздің жетекшіміз Любовь Жантайқызы айтқандай, бастысы орын емес, зерттеу жұмыстарымен айналыса отырып, өз-өзімізді дамыта алуымыз маңызды. Мен, мысалы, зерттеулермен айналысқалы мүлдем басқа адамға айналдым. Менің қазіргі нұсқам маған қатты ұнайды.

Сондай-ақ, байқау өткен «Бөбек» Ұлттық ғылыми-практикалық білім беру және сауықтыру орталығының бас директоры Абылай Сыдықов пен Файми Зуфаровқа алғыс хат табыс етті. Белгілі болғандай, балалар байқауға  уақытынан бұрын келіп, ұйымдастырушыларға волонтерлік көмек көрсетіпті. Атап айтқанда, байқауға қатысушылар үшін орын сілтеуші гид қызметін атқарыпты.