Бүгін Тараздағы Зияткерлік мектеп директоры Тимур Нуркешов бір топ оқушылар мен олардың ғылыми жетекшілерін қабылдады. Олар жақында Алматы қаласында өткен Зияткерлік мектеп оқушылары арасындағы ғылыми жобалар байқауының жеңімпаздары.

Тимур Сейтқажыұлы химия бағыты бойынша 1 орын алған Аружан Кенешбекованы, физика бағыты бойынша 2 орын иеленген Алижан Шолпанбековты,  өлкетану ғылымы бойынша 3 орыннан көрінген Бауыржан Апил мен Ерсұлтан Тұрсынды, биологиядан жоба қорғап 3 орын алған Дарина Мухамеджанова және математика бойынша 3 орынды жеңіп алған Досжан Темірбековті құттықтады.

– Ұсынылған сегіз жобаның бесеуі жүлделі орындарға ие болды. Бұл өте жақсы көрсеткіш. Алдағы республикалық кезеңде бұдан да жоғары нәтижеге жетулеріңізді тілеймін. Ол үшін сіздерге жақсы дайындық қажет. Жетекшілеріңіздің де еңбегі зор. Барлықтарыңызға зор алғыс білдіремін, – деді мектеп директоры кездесуде.

Республикалық ғылыми жобалар байқауының желілік кезеңіне ел аймақтарындағы Назарбаев Зияткерлік мектептерінен жиналған 200-ге жуық оқушы қатысқан. Зияткерлер жобаларын төрт негізігі бағытта қорғады: «Ғылыми-техникалық прогресс – экономикалық дамудың негізгі буыны ретінде», «Экономикалық және әлеуметтік процестерді математикалық модельдеу», «Салауатты табиғи орта – «Қазақстан-2050» стратегиясын іске асырудың негізі», «Қазақстанның тарихи ескерткіштері және перспективті туристік бағдарлар».

Төрешілер құрамында Алматы қаласының алдыңғы қатарлы жоғары оқу орындарының 35 профессоры, Phd докторлары және оқытушылар болды.